अमळनेर प्रतिनिधी – रयत संदेश न्यूज नेटवर्क
अमळनेर तालुक्यातील देवगाव देवळी येथील महात्मा जोतीराव हायस्कूलमध्ये आज संविधान दिवस मोठ्या उत्साहात साजरा करण्यात आला. कार्यक्रमाचे अध्यक्ष शाळेचे मुख्याध्यापक अनिल महाजन होते, तर कार्यक्रमाचे सूत्रसंचालन आणि प्रस्ताविक सांस्कृतिक विभाग प्रमुख आय.आर. महाजन यांनी केले.
सोहळ्याची सुरुवात डॉ. बाबासाहेब आंबेडकर यांच्या प्रतिमेचे पूजन करून करण्यात आली. संविधान दिनानिमित्त शाळेत वकृत्व स्पर्धा आयोजित करण्यात आली, ज्यात इयत्ता आठवी, नववी आणि दहावीतील 22 विद्यार्थ्यांनी संविधानाचे महत्त्व यावर मनोगत व्यक्त केले. स्पर्धेचे परीक्षक स्काऊट शिक्षक एच.ओ. माळी होते. प्रथम, द्वितीय, तृतीय आणि उत्तेजनार्थ विजेत्यांना शाळेच्या बक्षीस वितरण समारंभात पुरस्कार देण्यात येणार आहेत.
स्काऊट शिक्षक एच.ओ. माळी यांनीही म्हटले की, “भारताच्या लोकशाहीचा पवित्र उत्सव म्हणून संविधान दिवस साजरा केला जातो. संविधानातील समानता, बंधुता आणि शिक्षणाचे मूल्य प्रभावीपणे जोपासले जाते. संविधान ही आपली शान आणि प्रत्येक नागरिकाचा अभिमान आहे.”
अध्यक्षीय भाषणात शाळेचे मुख्याध्यापक अनिल महाजन म्हणाले, “भारतीय संविधानाने प्रत्येक नागरिकाला हक्क दिलेच पण जबाबदाऱ्या देखील दिल्या आहेत. त्यांचा सन्मान राखणे हे आपले कर्तव्य आहे. संविधान हे केवळ कायद्याचा ग्रंथ नाही, तर लोकशाही, समानता, न्याय आणि स्वातंत्र्याचे मूळ स्त्रोत आहे. चला, त्याचा मान आणि सन्मान राखूया व मूल्यांचे पालन करूया.” त्यांनी शाळेतील सर्व विद्यार्थ्यांचे मनोगत सादर केल्याबद्दल अभिनंदन केले.
वकृत्व स्पर्धेमध्ये परीक्षक म्हणून एच.ओ माळी यांनी काम पाहिले शाळेतील चार विद्यार्थ्यांना बक्षीस आय.आर महाजन सर यांच्या वतीने दिले जाणार आहे.
प्रथम-शुभांगी प्रभाकर पाटील इयत्ता दहावी
,द्वितीय-श्रेया सुरेश पाटील इयत्ता नववी,तृतीय-तनुश्री रविंद्र सोनवणे इयत्ता नववी,उत्तेजनार्थ-समर्थ रतिलाल भिल इयत्ता आठवी हया विद्यार्थीनी यश संपादन केले.
कार्यक्रम यशस्वी करण्यासाठी शिक्षकेतर कर्मचारी देवेश पाटील,गुरुदास पाटील यांनी महत्वाचे योगदान दिले, तर आभार प्रदर्शन आय.आर.महाजन यांनी मानले.
