अमळनेर प्रतिनिधी -रयत संदेश न्यूज
मारवड, मारवड येथील कै. न्हानाभाऊ मन्साराम तुकाराम पाटील कला महाविद्यालयात विद्यार्थी विकास विभाग व राष्ट्रीय सेवा योजना विभाग यांच्या संयुक्त विद्यमाने क्रांतीज्योती सावित्रीबाई फुले यांची जयंती साजरी करण्यात आली.
या कार्यक्रमाचे सूत्रसंचालन प्रा. डॉ. दिलीप कदम यांनी केले. या प्रसंगी प्रमुख अतिथी म्हणून महाविद्यालयातील राष्ट्रीय सेवा योजना अधिकारी प्रा. डॉ. सतिश पारधी हे होते. कार्यक्रमाचे अध्यक्षस्थान महाविद्यालयाचे प्राचार्य डॉ. वसंत देसले यांनी भुषविले.
कार्यक्रमाच्या सुरुवातीला प्राचार्य डॉ वसंत देसले, उप प्राचार्य डॉ. व्ही. डी. पाटील व उपस्थित मान्यवरांच्या हस्ते प्रतिमेचे पूजन करण्यात आले. कार्यक्रमाच्या प्रास्ताविकात विद्यार्थी विकास अधिकारी प्रा. डॉ. जितेंद्र माळी यांनी ज्ञानज्योती सावित्रीबाई फुलेंच्या सत्यशोधक विचारांचा परीचय करून दिला.
तर प्रमुख वक्ते राष्ट्रीय सेवा योजनेचे कार्यक्रम अधिकारी प्रा. डॉ. सतिश पारधी यांनी आपल्या व्याख्यानात सावित्रीबाई फुले यांनी तत्कालीन समाज व संस्कृतीचा विरोध पत्करून मुलींच्या शिक्षणासाठी घेतलेल्या कठोर परिश्रमांची जाणिव करुन दिली. तसेच त्यांच्या विचारांचा वारसा सुरू ठेवून सामाजिक बदल कसा करता येईल यावर भाष्य केले.
अध्यक्षीय भाषणात प्राचार्य डॉ. वसंत देसले यांनी सावित्रीबाईंनी केलेल्या कार्यावर प्रकाश टाकीत त्यांच्या स्त्री शिक्षण व महीला उध्दाराच्या कार्याची माहिती दिली.
सदर कार्यक्रमाचे आभार प्रदर्शन महीला कार्यक्रम अधिकारी प्रा डॉ नंंदा कंधारे यांनी केले.
याप्रसंगी महाविद्यालयातील सर्व शिक्षक-शिक्षकेत्तर कर्मचारी व विद्यार्थी-विद्यार्थिनी उपस्थित होते. कार्यक्रमाची सांगता राष्ट्रगीताने करण्यात आली.
