जळगाव प्रतिनिधी -रयत संदेश न्यूज नेटवर्क
जगात बहुतांश देशांत आपला राज्यकारभार चालविण्यासाठी संविधानाची निर्मिती करण्यात आली आहे मात्र फ्रान्स , रशिया , जर्मनी , पाकिस्तान या व अन्य काही देशांमध्ये एक संविधान बदलवून दुसरे संविधान स्वीकारले गेले आहे . मूलभूत अधिकार , नागरिकांचे हक्क , महिलांना मतदानाचा हक्क या सारख्या मानवतावादी मूल्यांना मात्र अमेरिका , फ्रान्स सारख्या देशांच्या संविधानात सुरवातीपासून आलेले नाही , भारतीय संविधानात मात्र जन्म , जात , धर्म , जन्मस्थान , लिंग , भाषा यावरून कोणताही भेदाभेद करता येणार नाही याची नोंद सुरवातीला च केलेली असल्याने भारतीय संविधानाचे ते वेगळेपण दर्शविते व सर्व जगाला दिशा देणारे ठरते असे स्पष्ट प्रतिपादन प्रसिद्ध साहित्यिक जयसिंग वाघ यांनी केले .
जळगाव जिल्हा बार असोसिएशन तर्फे संविधान गौरव दिनानिमित्त जिल्हा सत्र न्यायालयात आयोजित कार्यक्रमात मुख्यवक्ता म्हणून भाषण करताना वाघ बोलत होते .
आपल्या अभ्यासपूर्ण भाषणात जयसिंग वाघ यांनी सांगितले की, स्वातंत्र्य , समता, बंधुता ची भाषा वापरून स्वातंत्र्याची लढायी लढणाऱ्या अमेरिका , फ्रान्स या देशाच्या संविधान सभेत मात्र एकही स्त्री , गुलाम , आदिवासी प्रतिनिधी म्हणून नव्हते मात्र भारताच्या संविधान सभेत महिला , अस्पृश्य , आदिवासी , अल्पसंख्य या सर्व समाज घटकांचे प्रतिनिधी होते . भारतीय संविधानाने केवळ सरकारलाच मार्गदर्शन करण्याचे काम केलेले नाही तर प्रत्येक व्यक्ती सुरक्षित कशी राहील व प्रत्येकाला समान अधिकार कसे राहतील , नागरिकांच्या हक्कांचे कसे संरक्षण केले जाईल याची याची पूर्ण खबरदारी घेतली गेली आहे म्हणूनही ते दिशादर्शक ठरते .
सुरवातीस डॉ. बाबासाहेब आंबेडकर व संविधान ग्रंथाचे पूजन करण्यात असेल .
कार्यक्रमाचे सूत्रसंचालन व आभार प्रदर्शन ॲड.सागर चित्रे यांनी केले , मंचावर ॲड. स्मिता झाल्टये , ॲड. वीरेंद्र पाटील , ॲड. प्रवीण चित्रे , ॲड. लीना म्हस्के उपस्थित होते .
कार्यक्रमास ॲड. राजेश झाल्टये, ॲड. राजेश गवई , ॲड. आनंद कोचुरे , ॲड. अभिजित रंधे , ॲड. डी. एस. भालेराव आदींसह वकील , कर्मचारी मोठ्या संख्येने हजर होते .
