अमळनेर प्रतिनिधी -रयत संदेश न्यूज
अमळनेर येथील श्रीमती इंदिरा गांधी विद्या मंदिर या शाळेत भारतीय संविधान दिवस विविध उपक्रमांनी साजरा करण्यात आला. सदर संविधान दिवसाचे महत्व शालेय विद्यार्थ्यांना अधिक पटावे आणि रुजावे म्हणून अमळनेर शहरातील विजयनाना पाटील आर्मी स्कूलचे उपक्रमशील शिक्षक उमेश प्रतापराव काटे हे प्रमुख अतिथी म्हणून उपस्थित होते. त्यांच्या हस्ते भारताचे संविधान प्रास्ताविक आणि संविधानाची प्रत तसेच डॉ. बाबासाहेब आंबेडकर यांचे गुरु महात्मा ज्योतिराव फुले यांच्या विविध चरित्रात्मक प्रति प्रथमदर्शनी मांडण्यात येऊन पुष्पहार अर्पण करून कार्यक्रमाची सुरुवात करण्यात आली. कार्यक्रमाचे अध्यक्षस्थानी शाळेचे मुख्याध्यापक संदीप पवार हे होते.
यावेळी पुस्तक प्रदर्शन व अनोख्या सेल्फी पॉईंट चे उदघाटन उमेश काटे यांच्या हस्ते करण्यात आले. या प्रदर्शनात विविध थोर संत, विचारवंत, सामाजिक उद्धारक, क्रांतिकारक, संस्कार मूल्य, शिक्षक कसा असावा ? अशी शेकडो पुस्तकांची प्रथम दर्शनी मांडणी करण्यात आली होती. सदर पुस्तक प्रदर्शनाचे अवलोकन केल्यानंतर श्री काटे यांनी भारतीय संविधानाची निर्मिती कशी झाली ? त्यात किती सदस्य होते. त्यापैकी नेमके कोणी संविधान निर्मितीसाठी महान असे कार्य केले. संविधानाची रचना , कार्य आणि अंमलबजावणी आणि भारतीय संविधान जगात कसे अग्रस्थानी आहे याविषयी सविस्तर मार्गदर्शन केले. त्यात विद्यार्थ्यांना संविधान निर्मितीची प्रक्रिया समजावून दिली. संविधानातील मूलभूत हक्क आणि कर्तव्य यांची ओळख करून दिली. विद्यार्थ्यांना संविधानाच्या अभ्यासासाठी प्रेरित केले. नंतर संविधानावर आधारित प्रश्नमंजुषा हा एक चालता बोलता आगळा आणि वेगळा कार्यक्रम घेण्यात आला. ज्या विद्यार्थ्यांनी विचारलेल्या दोन प्रश्नांचे उत्तर अचूक दिली अशा विद्यार्थ्यांना क्रांतीज्योती सावित्रीबाई फुले आणि राजमाता जिजाऊ मासाहेब यांची चरित्रात्मक पुस्तके आणि पेन बक्षीस म्हणून भेट देण्यात आले. यात चेतना पंकज कोळी, प्रतीक्षा नामदेव कुंभार, रिया गणेश धनगर , रिमांशू राम साळुंखे आणि सोनू संजय पारधी या विद्यार्थ्यांनी स्वयंस्फूर्तीने सहभाग नोंदवत बक्षीस पटकावले. त्यानंतर सेल्फी पॉईंट साठी “माझा देश- माझा अभिमान- माझे संविधान” या उत्कृष्ट सेल्फी पॉइंटवर सर्व शिक्षक, शिक्षिका बंधू भगिनी प्रमुख पाहुणे आणि सर्व विद्यार्थ्यांनी आपला स्वतःचा सेल्फी काढून एक आगळा आणि वेगळा आनंद माझ्या संविधानाच्या बाबतीत नोंदवला. विद्यार्थ्यांना अश्या आगळे आणि वेगळ्या सेल्फी पॉईंट मधून आधुनिक माध्यमातून संविधानाची जोडणे, आणि सकारात्मक प्रचाराद्वारे संविधान दिन लोकप्रिय करणे, हा उद्देश साधण्यात आला. त्यानंतर उमेश काटे यांना नुकताच राजस्थानचे राज्यपाल हरिभाऊ बागडे यांच्या हस्ते “राज्यस्तरीय उत्कृष्ट पदाधिकारी पुरस्कार” व्हॉइस ऑफ मीडिया यांच्याकडून पंढरपूर या ठिकाणी समारंभ पूर्वक बहाल करण्यात आला. त्यानिमित्ताने श्री काटे सर यांचा मुख्याध्यापक संदीप पवार यांच्या हस्ते स्नेह वस्त्र, पुष्पगुच्छ आणि भेटवस्तू देऊन गौरविण्यात आले. या कार्यक्रमासाठी शिक्षिका सौ.बी. एस. चव्हाण, सौ .सी.एस. पाटील, ए. यु. महाजन, श्रीमती एस. एस. तेले, शिक्षक पी. एम. ठाकरे, व्ही.डी.पाटील, ए.पी. जाधव, वाय.जे .पाटील, डी. एस. माळी, राहुल पाटील यांनी परिश्रम घेतले.
——
